Në Galerinë White Cube është prezantuar “Nudita”, një ekspozitë e veprave të reja të Liu Wei-it. Duke marrë titullin nga eseu i filozofit Italian Giorgio Agamben, Liu përpilon ekspozitën si një syzhe të hulumtimeve në gjendjen e shoqërisë në këtë moment krucial në histori. Duke përfshirë instalacione, skulptura dhe piktura të reja të punuara gjatë këtij viti, ekspozita është një zgjerim i ekspozitës personale të artistit të mbajtur në Long Museum, Shangai dhe i përgjigjet emergjencës globale të shkaktuar nga pandemia.

Në skulpturën Speculation (2021), sikurse në pikturat “Nudity” dhe “Resurrection”, Liu eksploron gjuhën hibride vizuale dhe kognitive duke përdorë materiale dhe forma që sugjerojnë një antikitet të zhvendosur në kohë, apo, një të ardhme para ekzistuese. E instaluar, skulptura është e kompozuar nga sfera metalike dhe format e zgjatura ovale të strehuara brenda strukturës së thelluar që kujton formacionet shpellore apo eshtrat e zmadhuara. Në këtë strukturë, një gjysmë trup luani është i bashkëngjitur. Liu konsideron format e të dy serive si “akte të zhveshura”, të cilat janë alegorike dhe idiosinkratike.

E vendosur brenda një atriumi të harkuar të punuar nga rrjeti metalik qëndron skulptura e titulluar Vanguard (2021). Duke u tërhequr nga idetë e kolektivizmit, të rrënjosur në sistemin komunist, ajo i referohet modernizmit të fillimit të shek. 20, kur aspirimi për “Botën e Re” erdhi si preokupim kolektiv. Duke ndërlidhur këtë moment në histori me ngjarjet aktuale, Liu shpjegon: “Ajo që më intereson më shumë është eksplorimi i formave sociale, modeleve të qeverisjes dhe mundësisë të jetesës në bashkësi. Kjo, sipas meje, është bërë përsëri një aspiratë urgjente: a është e mundur për ne të freskojmë kuptimin tonë dhe aplikimin e sensit të kolektives, duke rimenduar kështu mënyrat si të jetojmë së bashku në situatat e sotme?”

Në skulpturën e formatit të madh Dimension (2021), pjesë e ciklit “Microworld”, ai eksploron tutje nocionin e të mbuluarës/pambuluarës, duke ju referuar një bote të observuar përmes mjeteve të avancuara shkencore dhe optike. E Formuar nga fletët e aluminit dhe e shpuar nga dy objekte sferike të ngjyrosura me të verdhë intensive industriale të veturave, ajo kombinon elemente ndërvepruese në një konfigurim që ngjason me stilin e Barokut. Blloqet ndërtuese për botën e re, ku njësitë më të vogla të materies janë zmadhuar dhe janë bërë të plotfuqishme, theksojnë manipulimin gjithnjë në rritje të raportit në mes të njerëzve dhe natyrës dhe përpjekjen për avancimet teknologjike. “Ne nuk mund të përjetojmë vërtetë këtë mikro-botë, por në një formë në jemi, padyshim, të bindur për ekzistencën e saj”, pohon Liu.

Autor: Milot Gusia, 2021